బ్లావి!?

కథలు వ్రాసే వాడు = కథా రచయిత = కథకుడు

నవలలు వ్రాసే వాడు = నవలా రచయిత = నవలాకారుడు

వ్యాసాలు వ్రాసే వాడు = వ్యాస రచయిత = వ్యాస కర్త

కవితలు (కవిత్వం) వ్రాసే వాడు = కవి!

బ్లాగు/లు(బ్లాగోతం) వ్రాసే వాడు = బ్లాగు రచయిత = బ్లాగరి = బ్లావి!?

ప్రయోగం: 1. అతడు గొప్ప బ్లావి. 2. ఆమె ప్రఖ్యాత బ్లావ.  3.వారు యువ బ్లావులు.

           
 

విశ్రాంతి!

విశ్రాంతి అంటే మనం సాధారణంగా చేసే పనులను చేయక మనతో మన కాలాన్ని గడపడం. మనసులో దిగులు,విచారం ఆందోళన లాంటి భావాలు లేక శాంతి నెలకొనడం. అనాది కాలం నుండీ పనిపాటలకు అలవాటు పడ్డ మనిషి విశ్రాంతి ప్రాముఖ్యతను మరచిపోతున్నాడు. దేవుడు ఆరు రోజుల్లో సృష్టి చేసి ఏడవ రోజు విశ్రమించి దానిని పరిశుద్ధ పరిచాడని బైబిలులో వ్రాయబడివుంది. అంటే విశ్రాంతికీ పవిత్రతకూ ఏదో సంబంధమున్నట్లుగా అవగతమౌతుంది.  విశ్రాంతి అంటే ఏ పనీ చేయకుండా ఉండడంకాదుగాని, సాధారణ పనులనుండి దృష్టి మరల్చడం.
  
యేసు అన్నాడు:” ప్రయాసపడి భారముతో వున్న సకల ప్రజలారా, నా దగ్గరకు రండి. నేను మీకు విశ్రాంతి ఇస్తాను.” లోకంలో చింతాక్రాంతులై భారభరితహృదయులైనవారికి యేసు ఆధ్యాత్మిక “విశ్రాంతి” వాగ్దానం చేశాడు.      

నెనళ్ళు!

బ్లాగ్లోకంలో “Thanks” (కృతఙ్ఞతలు) అనే అర్థంలో విరివిగా వాడబడుతున్న మాట: “నెనరులు”. అయితే దీన్ని ఇంకొంచెం సులభం చేసి “నెనళ్ళు” అనవచ్చని నా భావన.

ఉదాహరణకు:

ఊరు + లు = ఊరులు …. ఊళ్ళు
నీరు + లు = నీరులు …. నీళ్ళు
కుదురు+ లు = కుదురులు …. కుదుళ్ళు

చిగురు+లు = చిగురులు …. చిగుళ్ళు
నెనరు + లు = నెనరులు …. నెనళ్ళు!

ప్రేమతో, కరుణతో, కృతఙ్ఞతతో అనే అర్థంలో “నెనరుతో” అనేమాట ప్రాచుర్యమైనట్టు కనబడడంలేదు.

యేసు ఎవరు?

రెండు వేల సంవత్సరాలుగా అనేకులు తమ జీవితంలో ఎప్పుడో ఒకసారి ఈ ప్రశ్న అడిగివుంటారు. కొందరి నోట నేను విన్న సమాధానం : “అతడొక మంచి వ్యక్తి.ప్రవక్త.ఆ కాలం నాటి యూదులను ఎదిరించడంచేత సిలువ వేయబడ్డాడు.”

ఆయన విచిత్ర జననం గురించి, ఆయన చేసిన అద్భుత కార్యాల గురించి, ఆయన సిలువ మరణం గురించి మరియు ఆయన పునరుత్థానాన్ని  గురించి ఎన్నెన్నో వివాదాలు. అయితే విశ్వసించే వారికి యేసు దేవుని కుమారుడు.కుమారుడైన దేవుడు. నరావతారియైన సృష్టికర్త.